#تغريدة_مواطن
#احقنوا_ذاكرتكم
#بهذا_التنويه_الهام_الذي_لابد_من_ذكره
الناس اللي تسب اليوم في فرنسا في إذاعاتهم وصفحاتهم على الفيس وتقول ان فرنسا كافرة وهذه حرب صليبية تُستخدم فيها طائرات الرافال لقتل المسلمين .
بنقولولهم ، راهو هي نفس فرنسا الكافرة اللي في الـ2011 كبرتوا تحت طائراتها وقاتلتوا معها وسميتوا حتى اولادكم على رئيسها ! وقلتوا لولا فزعة ساركوزي
والناس اللي تقول ان مصراتة هذه بؤرة الإخوان والإرهابيين ولا بد من تطهيرها .
راهو هي نفس مصراتة اللي كنتوا تبعثولها في اولادكم وفي السلاح والذخيرة بالجرافات من بنغازي سنة 2011 !
وأنتم يا مصراتة اللي توا تقولوا على عرب بنغازي عبيد حفتر و قرامطة ولابد من تحريرهم مش هم نفسهم اللي كنتم اتغنوا عليهم وتقولوا في سنة 2011
( يا بنغازي ماك ابروحك ،، نحن ضمادين اجروحك ) !
ويا عرب الشرق اللي تقولوا أن طرابلس مختطفة وفيها المتشددين ونحن دازين أولادنا لتحريرها وهذه عاصمة كل الليبيين .
كيف صار ، مش كنتوا تقولوا في سنة 2011
( يا شباب العاصمة ،، نبوها ليلة حاسمة )
وياجماعة الزنتان اللي تكبروا وتقاتلوا وتموتوا اليوم مع قوات بركان الغضب .
مش هي نفس قوات ( البنيان ) اللي في الـ2014 قتلت منكم 350 زنتاني و خلفت فيكم 1000 جريح وأسمتكم القرية الظالم اهلها !
**اخر نقطة في التنويه**
يا جماعة الخير ، تركيا وأردوغان اللي يحارب فيها سيادة المشير الآن ويقول استعمار تركي .
راهي هي نفسها تركيا وهو نفسه اردوغان اللي جوكم في الـ2011 وكان هو سيادة المشير يقصفون ويحاربون الجيش الليبي جنباً الى جنب !
التوقيع :
مواطن ليبي متشمت يستنى
في اليوم هذا من 10 سنوات