الشاعر المقاوم : ضو الميلوسي .
اتفوت الزعازع والظلام الماسي
وجورة الظلم القاسي
وتبقى الرواسي الشامخات رواسي
ديمة ديمة
ما يهزنا زعزاع طالق غيمة
عواصف سنين الغدر وبراريمة
وروح الخيانة في هجين اجناسي
عنوان نقعد للشرف والقيمة
شوامخ على الوسواس والخناسي
وتصعب على بو عقال ومجاهيمة
حتما ايجيبه الوقت تحت امداسي
وتنهض سواعد حاضنات الخيمة
وتقعد اهلها دائمين كراسي
................................
الخضراء عنيدة صلبة
على لون واحد موش كيف الحربة
طاهر سماها وبحرها والتربة
عاطر ثراها تعشقه لنفاسي
تظل ثابته وين العدو يستربه
اعزوم صانها ربي الكريم رواسي
سوى يبعدوا ليام والا قربه
احنا والجبال الراسيات سواسي
والي معانا بالهروب ادربه
ندم يجبره يقعد سنين ايقاسي
ابيهرب من التاريخ وين الهربه
التاريخ لا يغفر ولا هو ناسي
..............................
كيف الجبال عوالي
ما يهزنا زعزاع ريح اجبالي
اتقابل اخشوم المزن برقه عالي
اينور زعانيف السحاب الكاسي
اتشع شمسها بعد الظلام المالي
اتطهر تراب الوطن من لدناسي
ديني ووطني ورمز عندي غالي
هما دليلي وشمعتي ونبراسي
قريب وطنا ايجيه الفزع متوالي
اجيوش حاشدة فيها الزعيم ايواسي
والطبل يرزم والفزع متكالي
طوفان متغلين شديد الباسي
ايخلي أوكار الخائنين خوالي
اتموت الخيانة وعرقها في الناسي
يهب عونها ويصفى غوش بنتالي
من بعد طابت درخة الدراسي
....................................
اتفوت الزعازع والظلام الماسي
وجورة الظلم القاسي
وتبقى الرواسي الشامخات رواسي